Presoak eta gazte auziperatuak. Bi errealitate oinarri berberarekin: oinarrizko eskubide zibil eta politikoen urraketaren ondorio. Asteburu honetan gazteok bi zita garrantzitsuren aurrean aurkitzen gara. Zoritzarrez, berriro ere kalera atera beharko gara gure eskubideak defendatu eta hauek errespeta daitezen exijitzeko.

Demokrazia eza ukaezinezko errealitatea da oraindik Euskal Herrian. Ehundaka izan dira azken urteetan atxilotu, torturatu eta espetxeratutako gazteak. Ehundaka dira beraz, epaiketaren zain, kartzelan edota baldintzapeko askatasun faltsuan aurkitzen diren gazteak, baita atxilotzeko arriskuan jarraitzen duten gazte andana. Horrek gazteon gaineko errepresio bortitzaren adierazle besterik ez da, betikotu ezin daitekeen egoera larria, onartu ezin dezakegun egoera alegia.

Gazte 1+ EZ! Dinamikak argi erakusten du gazteok herri honetan errepresioaren jopuntuan aurkitzen garen sektorea garela, dinamika horren baitan bildutako gazte auziperatuek, gazteriaren eskubideen urraketa etengabearen testigu zuzenenak izanik. Eskubide zibil eta politikoen errespetua lortzeko bidean, ekarpen ezin hobea egiten dio dinamika honek, lehenengo pertsonatik hasita, gazterian aldarri hau zabalduz, kontzientziak astinduz.

Aipatutako errepresio orokor horren baitan, muturreko egoera jasaten duten sektorea dauzkagu euskal preso politikoak ere. Esan bezala, ehundaka dira egun espetxeetan sakabanaturik aurkitzen diren gazte presoak. Isolamendua, bizi baldintza gogorrak, mehatxuak, xantaia, senide eta lagunak ikusteko oztopo amaigabeak, sakabanaketa... hau da gazte guzti horientzat egunerokotasuna, egun bat gehiago iraun ezin duen egoera larria, euren eskubideak ere, dagozkien eskubideak, errespetatzeko aldarria etengabe elikatu eta zabalduz.